ECUADORPASH ITALIAPASH PANKA ILLAKKUNA PANKAYUK TUKUCHUNMI LLANKAKRINKUNA
Llakta Pushak Rafael Correaka kunanmi Italiawan shuk ishkay mama llaktapura tantarita rurakrikushkata willarka, shinami chay llaktapi panka illakkunaka pankayuk tukunkakunapash, chay llaktaman rishkamanta rakirishka ayllukuna tantarinkapash, ishkay mama llaktapurapash yanapankakuna nirka.
Llakta Pushakka antanka chayanapimi chashna rimarka, chaypipashmi Italiamanta pushakkuna, ashtawanka Consejo de Ministros Italianos pushak Romano Prodita kushilla chaskishkamanta pagui nirka.
Antanka chayanata kushkamanta.- Llakta Pushak Correaka “antanka chayanata kunaka shuk shuway shinami kashka” nirka. Chay kushkakunataka kutintakmi alli alli rikukrinchik nirka, “tukuy Ecuadorpi kawsakkunami kullkita churashkanchik, shinapash chayka kamay kancha llanakchik wasikunapa makipimi kan, ashtawanpash paykunaka ashtaka ashtaka kullkitami chaskikrinkuna, kutin Kamayka mana imatachu chaskikrin, chayna mana allichu rikukrin” nirka.
Llakta Pushakka “shinaka kunanmantaka Suyu shayachishkata kamay kanchamanta llankachik wasi chayta hapishpa kullkita chaskinaka tukurinmi (...) Kamayka Cotopaxipi tiyashka antanka chayanatami allichinata hatunyachinata muna, chay shina karu llaktakunaman antankakuna chayachun munan” nirka.
Guayas Antanka Tantarina.- Llakta Pushakka Tribunal Constitucional nishka Guayas Antanka Tantarinapi (CTG mishu shimipi) pikuna kana kashkamanta Kamaypa nishkata ari nishkamantami kushilla karka.
Llakta Pushakka “chay antanka tantarika tukuy Ecuadorpi kawsakkunapa kullkiwan llankachishka, shinapash Kamayka mana chaypichu kan, ashtawankarin shuk >Junta Cívica nishakpiashmi chaypi kan, shinapash paykunataka mana pi riksinchu” nirka.
OPEP nishkaman tikrana.- Llakta Pushakka “chayman yaykunaka allipachami kan, chay shinami imapash mushuk willaykunata charishun” nirka. /GA/Ushku Chukuri/Llakta pushaypa killkay.
|
|
