Karu llaktakunawan Apanakuy Wasi pushakka teléfono nishkapi Ecuadormanta willakkunwan chashna rimarka, payka Madripi Ecuadorpa shutipi kak wasipimi karka. Payka Nicolás Issa Obandowanpashmi chishi Barceloman rina kashkata nirka, shinami kuytsatapash paypa ayllutapash rikuk risha nirka, chashnami Llakta Kamay payta yanapankapak munashkata rikuchirinka nirka.

Shinallatak Ecuador Kamayka Karu llaktakunawan Apanakuy wasiwanmi Ecuadorpi España shutipi kak wasiman mana allikachishka pankata kurka, chaypika “chashna makashkata mana rikunayachishkata, shinallatak makakta kacharichishka taripakta mana allikachishkatapashmi nin” nirka.

Mitsana.- Ecuadorpa shutipi Españapi kak Nicolás Issa Obandoka “makakka sarunpi ñami huchakunata charirka, chayta yachashpapash, makakta kacharishkamanta, piñami karka. Kunanka mana makakllatachu huchachirnchik, ashtawanka taripaktapashmi huchachirinchik” nirka. Chaymantapashmi España kamayta makay tukushka kuytsatapash paypa mamatapash mitsachun mañarka.

Karu llaktakunawan Apanakuy Wasi pushak María fernanda Espinosaka Llakta Pushak rafael Correa manarak Ecuadorman tikramushpa, kuytsapa aylluwan teléfono nishkapi rimashkatami nirka, shinallatak llakirishkatapashmi willarka.