SHINA SHINALLA 260.000 PORTOVIEJOMANTAMI CHUYA YAKUTA CHARINKAKUNA
Llakta Pushak Rafael Correaka kunanmi Portoviejo chuya yakuta charinapa Hatun Rurayta riksichirka, chaywanka shina shinalla 260.000 Portoviejopi kawsakkunapami alli kanka.
Llakta Pushakka Rurayka “mama llaktapa tukuy kuchunami chuya yakuta charichun munan, chaypami ashtaka dólarta mutsurin, chaytaka Kamayka maymantapash maskashpami kunka” nirka.
Shinallatak, Llakta Pushakka Manabí markaka “kullkita charishpapash mana allipi churashkamantami kay llakikunata charin. Tawka watakuna kipa chuya yakuta mana charishkata rikushpaka, llakinayanmi. Shinapash, kunanka, kaypi kawsakkunaka mana pagui ninachu kankuna, kay ruranataka Ecuador llaktapi kawsakkunapa kullkiwan, ñukanchik yana kuri kullkiwanmi rurakrinchik” nirkapash.
Portoviejomanta warmi alcalde nishka Patricia Brioneska shuti killkashkamanta pagui nirkami, shinallatak Portoviejomanta kari warmikuna kiti ñawpaman richun llankana kashkatapashmi nirka.
Ruray.- Kayta rurankapakka 35´714.285 dólartami mutsurin, kallaripika Corporación Andina de Fomento (CAF) nishkami 25´000.000 dólarta mañachinka, kutin 10´000.000 dólartami Kamayka kunka.
Chaytaka shuk watapimi ruranka, shinallatak llakta umaman, chawpiman, chakimanpashmi rakinka. Llakta muyuntinpa uchilla urkukunapimi kimsa hatun puntuta shayachinka.
Kay kimsa yakuta wakaychi puntumantami Portoviejopa 25 ayllu llaktakunaman rakinka, shinami kay kitipa 16 parroquia nishka yakuta chaskinkakuna, kay kitika 3.600 hectárea nishkatami charin, chakimanta umakaman rikushpaka 12 kilómetro sunimi kan, kutin alli makimanta lluki makiman rikushpaka 6 kilómetro nishka sunimi kan.
Kucha mama manña Wasi pushak Ricardo Patiñopashmi chay tuparipi karka, payka Llakta Pushak shina Portoviejo chuya yaku charina Hatun Ruray pankakunapi shuti killkarkami, shinallatak Carrizal-Chone ruraypa ishkayniki pata kallarinapa kullki kunapipashmi shuti killkarkapash.
|
|
