“LLAKTA KAMACHI TANTARIPA PUSHAKKA ALBERTO ACOSTAMI KANA KAN”
Llaka Pushak Rafael Correaka kunanmi karu llaktakunamanta pushakkunaman Llakta Kamachi tantaripa pushak Alberto Acosta kana kashkata nirka, paytami ashtakakuna akllashkamanta, shinallatak pay Alianza País nishkapa akllaypi kakkunapa umapi kashkamantami chashna kana kan nirka.
Llakta Pushakka Ecuadorpa kawsaypika “chashna mishashkataka mana uyarishkachu”, “llaktaka sarunpi mana rikushka shinami kunanka tantarishka kan” nirka.
Llakta Pushakka “sarunpi tiyashka ushayka urmakunmi, chay 2% nishka mana kashpa chay 3% nishkaka tukuypa kawsaykunata, ima tiyashkakunata paykunapa makipi charik karkakuna, kunanka llaktata rakikun nishpa, kasilla kawsanata chinkachikun nishpami kaparikunkkuna, shinapash paykunapa imapash charishka chinkakukpimi chashna kaparikunkuna” nirka.
Kipaka “sarun ushaykunaka” ishkay hunu kaymanta llukshikpika mana imatachu nirkakuna, llukshikkunaka ashtakatami llaki aparkakuna, rikpuramantaka ashtakakunami wañurkakuna, chashna kakpipash, mana imata nishkata nirkapash.
Llakta Pushakka “kunan, sarunwan rikushpa, ashtawan munashka Kamay tiyakpimi, kunan kaypi kawsakkuna shuktakyachinata ari nikpimi, mawka ushaykunaka, paykunapa ushay urmakushkamanta, mama llaktaka rakirikunmi” nirka.
Llakta Pushak Rafael Correaka paypa kamaypika “ashtaka” rurashkatapash, “ rimanakushpa ashta shuklla yuyayman chayashkatapash” nirka, shinpash “tukuylla shuklla yuyamanka mana chayarishkachu” nirka. “Llaktayuk kashka yuyakkunata kushichinaka mana hawallachu, ashtawankarin kunanka paykunapa makimantami ushay llushpikushkata rikun. Ari, paykunaka llakirikunkunami, paykunamanka valium nishkata upiyachunmi ni ushanchik” nirka.
Kikinpa kashka.- Kikinpa kashkamantaka, Llakta Pushakka Kashnami nirka, Llakta Kamachi Tantarika mana imatachu rurana kan, kunan Llakta Kamachipika tantarishpa charinamantami riman, shinapash neoliberalismo mana munashkamanta, shuklla kanata munashkamantami, chayka mana ñawpaman rishka nirka, shinallatak Llakta Kamachika pitilla rurakpura tantarimantapashmi riman, “paykunapa kikin kashka allpata mana chinkachishpa, tantarishpa shuktak kullki charinaman yaykuy ushachun” nirka.
Rafael Correaka “Kunan Llakta Kamachi nikushkawanmi imatapash rurarinka” nirka, chaypika mana shukllapapash, tantaripapash, kamaywan kamay kanchawan tantarishpa charinatapash nikun nirka. PD/Ushku Chukuri/Llakta pushaypa killkay.
|
|
