Correaka banco suramericanota shayachinamantami Argentina llakpapi rimarka
Buenos Aires, Argentina.- “Kunanpi ñukanchik llaktakunata llakichinaka mana antankata apanakunapichu, bombakunata shitak antankakunawanchu, kunanapika kullkiwanmi kan. Jawallami kullkita mañachinkuna, shinami dibi yaykunchik, chashnami paykunawan watarishka shina sakirinchik” Alianza PAÍSmanta pushak tukukrikuk Rafael Correaka nirka, chaytaka Argentina llaktamanta pushakwan tantanakushpa chashna nirka, paytami kullkiwan tantanakushpa shuk banco nishkata shayachishun nirka, chay banco nishkaka ñukanchikpura llaktakunamanmi kullkiwan yanapanka, shinami chay Banco Mundial nishkatapash Fondo Monetario Internacional nishkatapash ña mana maskakshunpash, chaykunamanta karuyashunpash nirka.
Correaka kay kunanpi kullkita manachikukkunata sinchi rimashpami, ñukanchipura llaktakuna 200 waranka junuta karu llaktakunapi wakaychishkata charishkamanta rimarkapash “Chay kullkikunatami apamuna kanchik, chaypaka chay banco central nishkakunata rikuna kanchik, sarun 90 watakunapi Banco Mundial nishkapa munashkata rurachunka mana sakinachu kanchik” nirkapash.
“Chay mana pikaykunawanka tukuchinami kanchik. Ñukanchik llaktakunapa karu llaktapi kak kullkikunataka tantachishpa chay banco suramericano nishkata shayachishpa, kayka tukuy kay suyupi kak llaktakunaman mañachichun, chayka ñukanchikllaktak wiñay ushashun ñawpamanpash ri ushashun” economista Correaka nirka. Correaka Argentina pushak Néstor Kirchnerwanpash, Argentinamanta gobierno pushak Alberto fernándezwanpash shuktakkunawanpashmi tantanakurka.
Shinallatak Correaka BMpash FMIpash ñukanchik latinoamérikapi kak llaktakunata llakichinkapak tiyashkamantapashmi rimarka. “Banco Mundial nishka kullkita wakchakunaman kun ninkunami, shinapash wakchakunaka chay mañachiska kullkikunamantami tiyankuna. Puntaka dibi tukunchikmi, kipaka, paykunapa makipimi kanchik, chayka watan watanmi kullkita tikrachina kanchik, shinapash ashtawan kullkita mañachinkapakka imakunatapash rurachunmi mañankuna, chay shina gaspi yanapakuk kullkita anchuchichun nin, gasolinata ashtawan valichichun nin, shuktakunatapashmi mañan” nirkapash.
Rafael Correaka karu llaktaman kullki dibishakata ima shina chayta tikrachishkamanta allikachirkami. “Ima shina chay dibi kullkita tikrachishka alli kachunka, pushak alli kashkatami nin, chay pushak tukuykunapa alli kashkatami maskarka. Payka Menen mana alli llamkashkamanta shuk wakllishka llaktatami chaskirka, shinallatak kikin kullkita shukman tikrachishkamanta, fondo monetario internacionalmantapashmi wakllishka karka. Shinapash Kichnerka dibikunata tikrachinkapakka PIB nishkamanta 3%talla kusha nirka, kutin Ecuador llaktapika 7%tami kuna kanchik, kunanka ashtawankarin ashtawantami mañakunkuna”, nirka.
Shinallatak “¡2000 watapi bonota charikkunaka chay bono nishkakuna ashtawan valichun maskarkakuna! Chaykunaka llaktata washanchinkunami kankuna, Ama pantarichkchu, bibimanta panakakunata charikkunaka Ecuador llakta ukupillatami kankuna, paykunami imata rurachun mana rurachun ninkuna” nirkapash.
ENERGIA NISHKAPIPASH TANTARINA
Ecuadormanta pushak tukukrikukka Kirchnerwan tantanakuypika energía nishkapi tantarinamantapashmi rimarka, chay shina Ecuador llaktamanta petróleo nishkata shuktak llaktakunapi chuyayachichun, chay shina “ama chay panta rurayta rurarinkapak chwa petróleota karuman katuna, kutin chuyayachishkata cantina. Chaypaka Venezuela llaktawanpash shuktak llaktakunawanpashmi rimana kanka” nirkapash
Shinallatak Ecuadorpi petróleoka Ecuadorpa kanpash kankapashmi nirka, shinami Constitución nishkapi nin, chaymantami ñukanchikpa kanka. “Mana imata shuktayachinachu kan, shinapash chay pushakkunapi satirishka mishukunami chay shina ñukanchik petróleo nishkata shuktakunaman, karu llaktamanta ishukunaman kunkapak imakunatapash rurashka” nirka.
Pushak tukukrikuk Rafael Correaka Argentina llaktamanta pushakta rikunaka sumakmi kashka nirkapash, shinallatak Ecuador Argentina shamuk punchakunapi ishkay tukushpa ruranakunamanta sumakmi kashka nirkapash.
|
|
