Correaka León Roldós asamblea constituyente nishkata shayachinkapak tukuy runakunata kayanamanta rimanakushkata mana paktachishkamantami willarka
Alianza PAÍSmanta pushak tukukrikuk Rafael Correaka, Venezuelamanta tikrashka kipallami, León Roldósta yankalla ari nik nishpa kayarka. León Roldóska Freddy Ehlerswan, Ramiro Gonzálezwan, Rafael Correawanmi democracia nishkata shuktakyachinkapak pankata killkarkakuna firmarkakunapash, shinapash chaytaka mana paktachinkapak munashkachu.
Chay killkashka pankapika Alianza PAÍSmantapash ID-Redmantapash pushak tukukrikukkunami enero killapi 16 punchapi 2.007 watapi Asamblea Nacional Constituyente shayachinkapak pankata killkarkuna.
Shinapash Roldóska chay killkashka pankata agosto killapi 11 punchapimi likirka, payka kashnami nirka: Congreso política unikillaykunata mana rurakpimi, tukuy runakunaman kayarinka. Shinaka ID-Red nishkaka enero killa 16 punchapika mana tapunaman kayankachu.
“León Roldóspa yuyaypika ID-Red nishkaka Ecuador llaktapi mana sapimanta unikillayta rurankapak munanchu, ashtawanpash paykunapa rurasha nishkakunapika Asamblea Nacional Constituyente nishkata shayachinaka mana kashkachu” Correaka nirka.
Izquierda Democrática nishkaka diciembre killapi 2.005 watapi Pushak Palacio ama chay tapuyta rurachun Cynthia Viteripa PSC nishkawanmi tantanakurka, shinami Constituyente nishkata mana munashkata ña rikuchirka.
KILLKASHKA PANKA
Quitopi, agosto killa, 10 puncha, 2.006 watapi, kaya chaki pankapi firmakkunaka kay katiriyakunatami ari ninchik:
1) Akllashka pushakka, enero killa, 16 puncha, 2.007 watapimi, Tukuy runakunata tapunakuyman kayanka, kipaka Asamblea Nacional Constituyente nishkatami shayachinka, chay shina Ecuador llaktamanta política kinchata unikillankapak, chaypaka kay unikillaykunatami rurarinka.
a) Estado nishkata Rikuk wasikunatapash Tribunal Constitucional nishkatapash partido político makimanta surkuna.
b) Akllashkakunamanta akllankapak mushuk kamachikuna: Tribunal Supremo Electoral nishkata ishkay llamkak wasikunawan unikillana: shukka yupaykunatami rikunka, kutin shuktakka akllana taripanatami ruranka. Chay wasikunapika partido político nishkamanta runakunaka mana tiyankakunachu.
Shukllata akllashpa paypa katipi shuktak kakkunata akllanata anchuchirinkami.
Kullkiyukkuna akllanapi paykunapa munashkawan ama atichunka, Estado nishkaka tukuymanmi chayllatata pachata radio nishkapipash televisión nishkapipash kunka, chashnami tukuylla pakta pakta paykunapa gobiernopi kashpa ima ruranakunata riksichinka. Shina kakpika, Estado nishkaka partido nishkakunamanpash tantanakushkakunamanpash mana ima kullkitachu kunka. Shinaka imapapash akllachun munashkaka radiopipash televisiónpipash, ashtawan kullkita charishkamantalla, mana ashtawan pachata rimay ushankachu.
c) Pushaktapash katik-pushaktapash llukchishpa kachana
d) Llaktapa pushakka paypa pushanapi Congreso nishkata shuklla kutin llukchishpa kachana, shinallatak mushuk Congresote charinkapak akllanaman kayana. Chay akllaypillatakmi pay katina kashkata mana kashpaka sakina kashkatapash tapunka.
2) Pushakka shikanpash yachakpash umayukpash runakunawan pushakrikukta rikuchina kan, chay shinami kay killkashka pankataka paktarinka.
3) Congreso kay killkashka pankata paktachinkapak jarkakpika, kay killkashka pankapa diputado nishkakunaka Congresopi paykunapa llamkanata sakinkakunami.
Rafael Correa Delgado / Karillapash Mitsarikpash llakta (PAÍS)
Freddy Ehlers Zurita / Nuevo País
León Roldós Aguilera / ID-RED
CORREAKA VENEZUELALLAKTAMANTA TIKRARKAMI
Kayna sábado punchami Caracasmanta tikramurka, chaypika viernes puchami “Latinoaméricapa mushuk kullki apana política nishka”manta rimarka. Paytaka Universidad Bolivarianami kayarka. Alianza PAÍSmanta pushak tukukrikukka Universidadpa pushak Andrés Eloy Ruizwanpashmi tuparka, shinallatak Venzuela llaktapa pushak Hugo Chávezwanmi tutaka mikurka.
|
|
