Rafael Correaka paypa katiktami akllarka, payka Lenin Morenomi kan, payka administración de empresas nishkapi licenciadomi kan
Alianza PAÍSpa Pushak tukukrik Rafael Correaka, kunan cantón Palestina nishkapi, Guayas markapi, paypa katik shinata pi kashkata riksichirka, Payka Lenín Morenomi kan, payka Director Nacional de Discapacidadesmi karka.
Morenota, 53 watayuk, Administración Píblicapi Licenciadomi kan, kay punchakunaka Fundación Eyentapa pushakmi kan, chay fundación nishkaka yuyaykunata, taripanata, asinatapashmi yachachin. Payka kawsaypipash llamkanapipash kushilla kanamanta, asinamantami riman.
Katik pushak tukurikka, Qutopimi paypa warmiwanpash paypa kimsa ushikunawanpash kawsan, payka runpayuk tiyarinapimi purin, payka kikin chakiwan mana puri ushanchu. Payka 3 enero killapi 1.998watapimi paypa tullu ñutukupi llaki aparka, chaypimi payta shuwakukpi, shuk tukyayta chaskirka, chay punchamantami mana puri ushan.
Cantón Palestina nishkapimi Lenín Morenota Rafael Correapa katik shinata riksichishka. Alianza PAÍSpa jatun tantanakuypimi chashna riksichirka, chaypika 10.000 waranka yalli runakunami tantanakurkakuna, chaypi kakkunaka allpapi lamkakkunami karkakuna. Correaka paypa rimaypika Gobiernopi caspa ima shinata allpapi llamkanapi shuk sapimanta unikillanata rurakrikushkatami riksichirka.
Paykunapa shutikunataka Alianza PAÍSmi shamuk lunes 7 punchata Quitopi Tribunal Supremo Electoralpi killkachinka
Pitak pushakpa katikka kashka
Lenín Voltaire Moreno Gárceska Nuevo Rocafuertepimi wacharirka, Orellana Markapi, 19 marzo killapi 1.953 watapi. Warmiyukpash kimsa ushiyukpashmi kan, tukuyllami Quitopi kawsankuna.
Lenín Morenota Administración Pública nishkapi licenciadomi kan, payka Universidad Centralpimi yachakurka, chaypillatak Ciencias Psicológicas jawa kimsa cursotami yachakurkapash.
Kawsaypipash llamkaypipash kushilla kanata asinatapashmi paypa rimaykunapika yachachin. Payka Fundación Eyentapa pushakmi kan. Chaypika yuyayta mirachinkapakmi yachachin, asinamantapash taripanpashmi.
Rafael Correpa katikka 2.001 watamanta 2.004 watakamanmi Director Nacional de Discapacidades karka. Puntaka Federación Nacional de Cámara de Turismopapash Cámara de Turismo de Pichinchapapash director ejecutivomi karka.
Lenín Morenoka tawka kamukunatami killkashka, chay shina “Kawsaypapash llamkaypapash uku yuyay”, “Asinamanta killkashkapash ima shina kashkapash”, “Kushilla kanaka jawallapash asinayaypashmi kan”, Tukuy pachamanta ashtawan sumak asichinakuna”, “Jatunkunapa asina”, “Suni shimipa rimaykuna”, “Mana allpamanta rimaykuna”.
Lenín Morenoka “kutin kawsanpak munak kari” shina nishpami payllatak kayarin, shuyunatapash shinallatak chay Arte de Renacimiento nishkatapashmi munan. Paypa ashtawan killka-katinata munashka kamukunaka filosofía nishkamanta, ensayo nishkamanta, asinamantapashmi kankuna. Wanpunpash, wirwilata takinpash.
|
|
