KAMAYKA KILLAN KULLKI CHASKINAPIMI 30 DÓLARTA MIRACHIRKA
Llankay Wasi pushak Antonio Gagliardoka shamuk 2008 watamanta, enero killamanta, 1 punchamanta mushuk killan chaskina kullkika, kamay kanchamanta llankakkunapa, 200 dólarmi kanka nirka.
Wasi pushakka kunan llankakkunapa mushuk killan chaskina kullki 170 dólar kashkapika 17,65 % nishkatami mirachina kan nirka, chayka uchilla shuktakyachipi, tarpunapi, maquilla nishkapi llankakkunapapashmi kan nirka.
Yanuk kari warmikunapash, makiwan rurakkunapash, uchilla llankachik wasikunapi yanapakkunapashmi 170 dólarta killan killan chaskinkakuna, kunankamanka chayka 120 dólarmi karka nirka.
Kay mushuk killan chaskina kullkika pushak nishka killkashkawanmi tiyay kallarinka, chayka shamuk 2008 watamanta, enero killamanta 1 punchamantami kanka. Llankakkunapa, Llanakachikkunapa kachamushkakunapash Llankay Wasipash (MTE mishu shimipi) mashnata mirachina kashkata mana ni ushashkamantami chashna rurarishka nirka.
MTE nishkapa ukumantapash, Kawsay shikan Wasikunapa yuyaykunata uyashpami chashna mirachanaman chayashka nirka.
Gagliardoka “Llakta Pushak Correapa nishkata uyashpa, Runa Hataripa rurash nishkata rikushpami shuklla killan chaskina kullki tiyachunmi chashna rurashkani, shinapash Llakta Kamachipi 35 yupayniyukpash, 18 yupayniyukpash, 163 yupayniyukpash piti kamachita rikushpami chashna rurashkani” nirka. Paypa yuyaypika kaywanka imapash rantina.katunaka mana mirankachu nirka, shinapash llanakchik wasiyukkunaka mirankami nishkakuna.
Llakichina.- Kay nishkata mana uyakkunaka llakichishkami kanka nirka, shinami shuk llankakmana mana chay kullkita kukpika, paykunaka 6 killan chaskina kullkitami kuna kan nirka.
Kamaypa ruranamanta.- Shamuk watapa chashna mirachishkaka watan watanmi 2001 watakaman chashna kanka, shinami shuk killapi mikunkapak kawsankapak mutsurishkawan pakta pakta tukunka nirka.
Banco Central nishkami kay yupaykunataka rikukun nirka, shinami 2008 watapi mashnakaman valina kashkata rikushpa chay yupaykunata rurashka nirka.
Shinaka Consejo Nacional de Salarios nishkaman rikuchinapika 30 dólarta watan watan mirachinatami willakun nirka.
|
|
