LLAKTA PUSHAK CORREAKA ESTADOS UNITDOSTAKA KUTINKA MANA YALLINKACHU
Llakta Pushak Rafael Correaka kunanmi Miami antanka chayanapi llakishishkata mana allikachishkata nirka, chaytami Arabia Sauditaman, Chinaman rina kashpa yallina karka, chaymantami “ushashpaka kutinka Estados Unidsotaka mana yallishachu, chaypi llankakkunaka Llakta Pushak kashkata yachashpapash tukuytami maskachirka” nirka.
Llakta Pushakka chashna llakichishkamanta Suyupa Ukupash, Estados Unidospa shutipi Ecuadorpi kak kishpichiway nishkata chaskinimi nirka, shinapash “Llakta Pushakta mana chashnachu llakichina kan. Pipash chaymanta shamukpika chashnallatakmi rurashun” nirka.
Llakta Pushakka “2001 wata, septiembre killa, 11 punchamantami chay llaktaka may mancharishka kawsan, chaymantami chashna pitapash llakichin. kayta yallishpaka llaki apashkanchikmi, mana kunallachu chashna kashka” nirka.
Shinallatak ONU nishkapa tantaripi kashpaka, yanka ñanta chinpankapakllami llaki apashkata nirka. “Bush shamukukushkamantami, tukuy ñankuna wichashka karka. Uyaychik, llaakta pushakkuna mana kishpilla kay ushashpaka, shuktak llaktamanmi Naciones Unidas nishkataka apana kanchik. Chasnaka mana kati ushanchikchu” nirka.
Llakta Pushak Correaka Karu llaktakunawan Apanakuy Wasipipash, Miamipi Ecuadorpa shutipi kak wasipipashmi pantay tiyashkata nirka. “Llakta Pushaypa allichinapa pantaymi kan, Karu llaktakunawan Apanakuy Wasipa pantaypashmi kan, Estados Unidospi Ecuadorpa shutipi kak wasipa pantaypashmi kan. Kaytaka allichikrinchikmi” nirka. Shinami Shangaimanta, Chinamanta, chusku chunka chuskuniki radio nishakapi rimanapika nirka
|
|
